اويونلار

علي ظفرخواه

شيطان زولاغي

اويونچولارين سايينجا ديوارين ديبي نين، ديك اوزو آشاغي اولان يئرينده، اويونچولارين سايينجا هره سينه بير بالاجا توپ يئرلشه جك قدر زولاق قازارلار. يعني هر اويونچونون ديوارين ديبينده بير زولاقي اولار. زولاقلار بير رديفده دئييل، توپلو حالتينده قازيلار. اويونچولارين بيري معين فاصيله دن توپو، زولاقلارا طرف ديغيرلادار. اگر اؤز زولاغينا سالابيلرسه،توپو ايكينجي اويونچو آليب ديغيرلادار. يوخسا اگر توپ باشقا اويونچونون زولاغينا دوشرسه ، او گليب بونون بويونونا مينه جك و توپي يئني دن ديغيرلاتمالي دير. اگر اؤز زولاغينا سالابيلرسه، ياخاسي قورتولوب، بويونونا مينن توپو ديغيرلاداجاق. يوخ، اگر باشقاسي نين زولاغينا دوشرسه، اؤنجه كي بويونا مينن ائنيب، بو تزه سي مينه جك. بئله ليكله اوشاقلار يورولانادك ايدامه تاپار.

مجلس قيزيشديران يا باش قاتان اويونلاردان

 

قاييشين ايچ اوزو

ايكي بارماق ائنينده، لئنت يا قاييش كيمي گؤن اولار. بير آدام بو گؤنو آرادان قاتلايار، طاقچا ساعاتي فنري كيمي بوكوب دولايار، قاييشين ايكي اوجونو ساغ الينده توتار، دولانميش قاييشي ايكي الي نين ايچينده موقابيل طرفه توتار و دئير:

قاييشين ايچري اوزون تاپ! طرف، دمير ميل يا دواملي بير چؤپو، آردان ظنني گئتديگي يئره سوخار و ميلين اوجو آشاغيدان چيخار، الينده قاييش اولان آدام گؤررسه طرف يان تاخيب قاييشين ساغ الينده كي اوجلاريني عادي حالدا چكر و بللي دير ميل ائشيكده قالاجاق. يوخ، گؤررسه دوز تاخيب، جلد ليكله سول الي ايله قاييشين بير قاتين آچيب ساغ الينده كي او بيريسي قاتين يانينا وئرر و ساغ الي ايله قاييشين اوجلاريني بيرگه چكر و البته ميل ائشيكده قالاجاق.

قايناق: ائل بيلگي ثروتيميز ـ علي ظفرخواه